मंसिर ६, काठमाडौं, संविधान जारी भएलगत्तै असन्तुष्टि व्यक्त गरी संविधान संशोधको माग गरिरहेका समाजवादी पार्टीका अध्यक्ष उपेन्द्र यादवले संविधान संशोधनको खाका तयार पार्ने मन्त्रालयको जिम्मेवारी पाएका छन् ।
डेढ वर्षअघि स्वास्थ्य मन्त्रीका रूपमा सरकारमा गएका उनले बिहीबारदेखि कानुन तथा न्याय मन्त्रालयको जिम्मेवारी पाएका छन् ।
पूर्वप्रधानमन्त्री एवं समाजवादी पार्टीका संघीय अध्यक्ष डा. बाबुराम भट्टराईले पार्टी अध्यक्षसमेत रहेका यादवको मन्त्रालय छापामार शैलीमा फेरिएको आरोप लगाएका छन् । उनले प्रधानमन्त्री केपी शर्मा ओलीको कार्यशैली स्वेच्छाचारिता र निरंकुश रहेको प्रतिक्रिया दिए ।
‘संसदीय व्यवस्थामा प्रधानमन्त्री सर्वेसर्वा हो । तर , सत्ता साझेदार दलसँग छलपल नै नगरी मन्त्री हटाउने र मन्त्रालय फेर्ने अलोकतान्त्रिक शैली हो ।’ उनले भने , ‘ मैले पनि सरकारको पुनर्गठनबारे मिडियाबाटै जानकारी पाएको हो । उपप्रधानमन्त्री सरकारी कामको सिलसिलामा विदेश भ्रमणमा हुनुहुन्छ । यस्तो अवस्थामा छापामार शैलीमा जुन काम भएको छ हामो पार्टीले यसको गम्भीर समिक्षा गर्छ ।’
पार्टीका केन्द्रीय अध्यक्ष एवं उपप्रधानमन्त्री यादव स्वदेश फर्किएपछि छलफल गरेर एउटा निर्णयमा पुग्ने डा . भट्टराई जानकारी दिए । यो समाचार सविन शर्माले आजको राजधानी दैनिकमा लेखेका छन् ।