पार्थीव शरीर व्यवस्थापन गर्ने एनआरएनएलाई रकम अपुग, परिवारलाई भने आर्थिक सहयोग गर्ने

लिस्बन । पोर्तुगलमा ज्यान गुमाएका दुई दाजुभाइको पार्थीव शरीर जनवरी २२ तारिख बुधवारका दिन दिउसो १:५५ बजे लिस्बनबाट दोहातर्फ उड्ने छ । २३ तारिख विहीबारका दिन नेपाली समय अनुसार बेलुकी ७:१० बजे त्रिभुवन विमानस्थलमा आफन्तहरुले पार्थीव शरीर बुझ्नेछन् ।

आज दिउसो गैरआवासीय नेपाली संघ (एनआरएनए), राष्ट्रिय समन्वय परिषद पोर्तुगलको कार्यालयमा राखिएको बैठकमा पार्थीव शरीर व्यवस्थापनका लागि सङ्कलित रकमको हिसाबकिताबबारे छलफल भएको छ । पोर्तुगल रहेका तीन दर्जन संस्थाहरुमध्ये मुश्किलले डेढ दर्जनले आर्थिक सङ्कलनमा सहयोग गरेका छन् ।

तामाङ समाज पोर्तुगलले ८९५ युरो सङ्कलन गरेको छ । जनसम्पर्क समिति पोर्तुगल ८१७ युरो, जनप्रगतिशील मोर्चा पोर्तुगलले ५४५ युरो र व्यवस्थापनको नेत्रित्व लिएको एनआरएनए, पोर्तुगलले ४३६ युरो मात्र सहयोग सङ्कलन गरेको छ ।

एनआरएनए, आइसीसी सदस्य रवीन अधिकारीले ४१६ युरो, मगर समाज पोर्तुगलले ३१५ युरो र अर्का आइसीसी सदस्य नारायणकाजी मगरले ३०१ युरो सङ्कलन गरेका छन् । तमु समाज पोर्तुगलले २७० युरो, चितवन समाज पोर्तुगलले २६५, गुल्मी समाज पोर्तुगलले २५२ युरो र अवैतनिक वाणिज्यदूतावास लिस्बनले २०२ मात्र सहयोग गरेको एनआरएनएले जानकारी दिएको छ ।

ठकुरी समाज पोर्तुगलले १९१, महिला समाज पोर्तुगलले १८५, तनहुँँ समाज पोर्तुगलले १२१, प्रवासी नेपाली एकता मञ्च पोर्तुगलले १२०, नारी समाज पोर्तुगलले ११२, नवलपुर समाज, पोर्तुगलले ११० र मदन भन्डारी स्पोर्टस् एकेडेमी पोर्तुगलले ७५ युरो आर्थिक सहयोग सङ्कलन गरेर शव व्यवस्थापनका लागि सहयोग पुर्‍याएका छन् ।

गणेश ज्ञवालीले ५१ युरो सहयोग गरेपछि कुल ५६८९ युरो सङ्कलन भएको छ । नेपाल पठाउन अन्तिम दाह संस्कारका लागि काम गर्ने एजेन्सी (फुनेररिया) कापुसुसले ६४०० युरो खर्च लाग्ने जनाएको छ । सम्भवत अपुग ७११ युरो एनआरएनएको कोषबाट ब्यहोरिने छ ।

पैसा उठेको छ तर एनआरएनएलाई नदिने

ब्रिल्यान्त हिमालय एशोशिएशन, नेपाली समाज र शेर्पा किदुकले आर्थिक सहयोग सङ्कलन गरेर पनि एनआरएनएलाई नदिने कुरा बजारमा हल्ला सुनिन आएको छ । एशोशिएशन समाज र किदुकले मृतकका परिवारलाई आर्थिक सहयोग गर्ने ती संस्थानिकट स्रोतहरुले बताएका छन् । व्यवस्थापनको जस आफैले लिन खोज्ने एनआरएनएले ४३६ युरो मात्र सङ्कलन गरेपछि गैरे नेत्रित्वलाई नैतिक दवाबस्वरुप ७११ युरो अपुग बनाइएको हुनसक्छ ।

एनआरएनएका उपाध्यक्ष सीता श्रेष्ठका अनुसार किराँत याक्थुङ चुम्लुङले आफ्नो हिसाब भोलि बुझाउने बताएको छ । पोर्तुगलमा सकृय संस्था भनिएका दर्जनौ समाजले पनि संस्थागत पहलमा रकम सङ्कलन गरेका छैनन् ।

एकाघरका दुई दाजुभाइ ५१ वर्षीय कमलबहादुर वाइबा तामाङ र ३४ वर्षीय सुरज वाइबा तामाङको जनवरी १२ तारिख आइतबारका दिन करिब दिउँसो १२:०० बजे समुन्द्रमा डुबेर असामयिक निधन भएको थियो ।

दाजु कमलको ६ वटा र भाइ सुरजका ४ वटा छोराछोरी रहेको आफन्तहरुले जानकारी दिएका छन् । तामाङ दाजुभाइ बल्छी लिएर माछा मार्न समुन्द्री किनारमा गएका थिए । उनीहरुलाई बोका दु इन्फेर्नो भन्ने ठाउँमा समुन्द्रमा डुबेको अवस्थामा भेटिएको थियो ।

स्थानीय समुन्द्री प्रहरीका कमान्डर रुइ पेरेइरा दि तेर्राका अनुसार उनीहरुको शरीर देखिएको करिब एक घण्टाको प्रयासपछि उद्धार सफल भएको थियो । उद्धार गरेर समुन्द्रबाहिर ल्याउदा दुवैको मृत्‍यु भइसकेको थियो । उद्धारमा समुन्द्री प्रहरी, बारुण यन्त्र र चिकित्सक गरी ३५ जना जनशक्ति परिचालन गरिएको तेर्राले बताएका थिए ।

परिवारसँगको छलफलबाट मृतकद्वयको पार्थीव शरीरलाई नेपालमा पठाउने प्रकृया थालिएको थियो । धादिङ घर भए पनि उनीहरुको परिवार केही समयदेखि सिमरामा वसोवास गर्दै आएका छन् ।

तामाङ दाजुभाइ विगत एक वर्षदेखि पोर्तुगलमा रहेका थिए । उनीहरु कास्काइसमा बस्ने गरेका थिए । पोर्तुगलमा २०१० यता ३२ नेपालीले ज्यान गुमाइसकेका छन् ।