काठमाडौँ, पुस १२ गते । पर्यटक भिसामा नेपाल प्रवेश गर्ने धेरैजसो विदेशीको शङ्कास्पद तथा आपराधिक गतिविधि दिन प्रतिदिन बढ्दै गएका छन् । गोरखापत्रमा समाचार छापिएको छ ।
पाँच महिना लामो पर्यटक भिसा लिएर आउने विदेशीहरूको अनलाइन ठगीदेखि बैङ्क तथा एटीएम ह्याकिङ, चोरी, मानव बेचविखन, यौन दुराचार, हत्या, अपहरण, लागूऔषध र दुर्लभ वन्यजन्तुको ओखटेपहार ओसारपसारमा संलग्नता बढ्दै गएको हो ।
नेपाल प्रहरीका अनुसार त्यस्ता अपराधमा भारत, चीन, बङ्गलादेश, बेलायत, अमेरिका, युरोप तथा अफ्रिका लगायत देशका नागरिकको संलग्नता बढी देखिएको छ ।
यो हप्ता शङ्कास्पद गतिविधि सञ्चालन गरेको अभियोगमा १२२ जना चिनियाँ नागरिक पक्राउ परेसँंगै विदेशीले नेपाललाई ‘ट्रान्जिट हब’का रूपमा प्रयोग गर्ने गरेको थप तथ्य बाहिर आएको हो । केन्द्रीय प्रहरी प्रवक्ता शैलेश थापाक्षेत्री विदेशी नागरिकको क्रियाकलापमाथि निगरानी आवश्यक रहेको बताउनुभयो ।
कतिपयले टे«किङ (पदयात्रा) का नाममा निषेधित क्षेत्रको तस्बिर तथा भिडियो खिच्ने, जासुसी गर्ने, धर्म परिवर्तन गराउँदै हिँड्ने र अश्लील क्रियाकलापलाई निरुत्साहित पार्न सम्बद्ध निकायले निगरानी बढाउनुपर्ने उहाँको सुझाव छ । कारागार व्यवस्थापन विभागका अनुसार हाल सञ्चालनमा रहेका ७४ वटा कारागारमध्ये ३१ वटा कारागारमा एक हजार २६९ जना विदेशी नागरिक कैदीबन्दी छन् ।
अधिकांश कैदीबन्दी जघन्य अपराधअन्तर्गत ज्यान मार्ने उद्योग, अपहरण तथा हत्या, बलात्कार, लागूऔषध, मानव बेचविखन, दुर्लभ वन्यजन्तुको चोरी शिकारी, बालयौन दुराचार, सङ्गठित अपराधमा संलग्न छन् ।
सबैभन्दा बढी केन्द्रीय कारागार जगनाथदेवलमा २१४, ललितपुरको नख्खुस्थित कारागारमा ११३, पर्सामा २२५, झापामा १११, मकवानपुरको भीमफेदीमा ६३, झुम्का (सुनसरी) मा ८५ र मोरङमा ५९ जना विदेशी कैदीबन्दी रहेका छन् ।
त्यस्तै, बाँकेमा ५२, महोत्तरीमा ३१, काठमाडौँ डिल्ली बजारमा २६, रौतहटमा २२, कपिलवस्तुमा २४, कास्कीमा ३१, पाल्पामा १६, रुपन्देहीमा १६, कैलालीमा ३१, कञ्चनपुरमा ११, बर्दियामा १४, चितवनमा १९ र दाङमा ११ जना कैदीबन्दी छन् ।
नेपालका कारागारमा २२ हजार ७२९ पुरुष, एक हजार ४९६ महिला र ९४ जना आश्रित बालबालिका गरी २३ हजार ८९६ जना स्वदेशी र एक हजार ६९ जना विदेशी गरी जम्मा २५ हजार १३८ जना कैदीबन्दी रहेका छन् ।
विभागका अनुसार, विदेशी कैदीबन्दीहरूमा करिब ५० प्रतिशत भारतीय नागरिक रहेका छन् । ती कैदीबन्दीका लागि वार्षिक करिब ८० करोड रुपियाँ खर्च हुने गरेको छ । नेपाल भ्रमण वर्ष–२०२० मा आउने पर्यटकमाथि उच्च निगरानी बढाउनुपर्ने भएको छ । यसका लागि अध्यागमन विभाग र प्रहरीको महìवपूर्ण भूमिका आवश्यक छ ।
अध्यागमन विभागका प्रमुख ईश्वरीराज पौडेलले शङ्कास्पद गतिविधिमा संलग्न विदेशी नागरिकको विषयमा सूचना पाएसम्म प्रचलित कानुनअनुसार कारबाही गरी धेरैलाई फिर्ता गर्ने गरेको जानकारी दिनुभयो ।
